بتعرف شو بيلفتني فيك؟؟؟
السلام عليكم ورحمة الله وبركاته..
موضوع اليوم شوي أنثوي؟؟هو طبعاً ليس حكر للعضوات فقط...أكيد بيهمني أعرف رأي الشباب كمان..
بصراحة لما بمشي بالشارع أو بكون بمكان عام أو حتى مع العيلة وبأي مكان..طبعاً بصادف شباب ورجال من كل الأعمار..
وفي كتير أشياء بتزعجني فيهن..سواء بالشكل أو بتصرفات معينة..( يمكن أنا بدقق شوي وبنتقد..وحبيت تشاركوني ببعض الانتقادات)
ومن الأشياء اللي بتدايقني:
لبس سلسال عالصدر.. (لشو هاد يعني؟؟ عن جد بحسو مو رجال) آسفة هاد رأيي الشخصي!!!
العلكة...( وخصوصاً في شباب بيمضغوها بشكل سيء جداً)
الحذاء الوسخ...( وهي أكتر شغلة يمكن بنتبه عليها..وعندي كتير مهمة)
فتح زرار القميص..( لشو تفتح الزرار..أول زر بيكفي..وخصوصاً اذا كان مو لابس تحته تي شرت ...يالطيف)
الرائحة الغير مستحبة...( مابتخيل شاب يطلع من البيت مو متحمم ومتعطر..والعطر عم يفوح منه 100 متر..ولييييي )
الأسنان الغير نظيفة..( وهي شغلة كتير ناس مابتهتم فيها للأسف.. مع أنها بتعكس نظافة الإنسان بشكل كبير)
الشعر الطويل..(ياااااااااااااي بكرهو..ولو كان حلو ولابقلو...بس بيتجرد من كل معاني الرجولة)
الأظافر الطويلة...( لأن الأظافر القصيرة بتدل على نظافته وترتيبه واهتمامه بنفسه)
رائحة الدخان...( هلئ في ناس بتدخن بس ما بتخليك تحس بانزعاج إذا حاكيتها..وفي ناس بتخليك تهرب منها من الرائحة الكريهة) وعلى كل حال أنا بكره الدخان كتييييييييييييييير...
مابدي حدا يزعل من الشباب..بالعكس هي تنبيهات لحتى تكونوا بصورة أحلى بنظرنا..
وأنا متأكدة أن في نسبة كبيرة من الصبايا بيتفقوا معي بالرأي..!!!
وبالنهاية الشكل مو كل شي بس لازم ما ننكر أن إلو دور كبير..ولا شو رأيكن؟؟
بتمنى أعرف الآراء بدون مجاملة...
ولكم جميعاً حبي واحترامي